A familia do cura Don Carlos Méndez doa a súa biblioteca persoal e outras pezas de valor ao Concello de Monterroso.
O alcalde de Monterroso, Eloy Pérez, asinou onte á tardiña na Casa do Concello un documento cos sobriños do cura Don Carlos Méndez que recolle a doazón ao Concello de Monterroso de numerosa documentación que compuña toda a súa biblioteca persoal, entre as que se atopan ademais moitas pezas de carácter histórico e artístico.
Na sinatura participaron o rexedor de Monterroso e tres dos sobriños do párroco: Luis, Carlos e Anxo Rodríguez Méndez.
O documento asinado onte é un protocolo previo antes de formalizar outro documento notarial cando todo o material se atope rexistrado; máis de 1.000 exemplares entre pezas, documentos e libros que van desde o ano 1.500 ata a actualidade.
Os tres sobriños de Don Carlos presentes na sinatura puxeron como condición que este legado permaneza sempre para o Concello de Monterroso. De incumprir esta claúsula, habería que devolverllo todo á familia.
O rexedor agradece á familia de Don Carlos a doazón deste importantísimo legado que achega documentos de gran relevancia sobre a localidade como a construción da igrexa, da propia Casa Consistorial, textos de historia ou etnografía, entre outros. “É un legado dun valor incalculable que agradecemos que poida custodiar o Concello de Monterroso”, precisa Eloy Pérez.